is dasht ki wusat mein simaT kar nahin dekha

is dasht kī vus.at meñ simaT kar nahīñ dekhā

ik umr chale aur palaT kar nahīñ dekhā

ham ahl-e-nazar ho ke bhī kab ahl-e-nazar the

hālāt ko ḳhud se kabhī haT kar nahīñ dekhā

ahbāb kī bāñhoñ kā nasha aur hai lekin

tū ne kabhī dushman se lipaT kar nahīñ dekhā

ik dard ke dhāge meñ piro.e haiñ azal se

is rishta-e-mauhūm se kaT kar nahīñ dekhā

yā raat ke dāman meñ sitāre hī bahut the

yā ham ne charāġhoñ ko ulaT kar nahīñ dekhā

kaise nazar aate mirī āñkhoñ ke jazīre

is bahr-e-talab ne kabhī ghaT kar nahīñ dekhā

shahzād'-qamar dekh rahā hai vahī duniyā

ḳhānoñ meñ jahāñ ziist ne baT kar nahīñ dekhā

is dasht ki wusat mein simaT kar nahin dekha

ek umr chale aur palaT kar nahin dekha

hum ahl-e-nazar ho ke bhi kab ahl-e-nazar the

haalat ko KHud se kabhi haT kar nahin dekha

ahbab ki banhon ka nasha aur hai lekin

tu ne kabhi dushman se lipaT kar nahin dekha

ek dard ke dhage mein piroe hain azal se

is rishta-e-mauhum se kaT kar nahin dekha

ya raat ke daman mein sitare hi bahut the

ya hum ne charaghon ko ulaT kar nahin dekha

kaise nazar aate meri aankhon ke jazire

is bahr-e-talab ne kabhi ghaT kar nahin dekha

shahzad'-qamar dekh raha hai wahi duniya

KHanon mein jahan zist ne baT kar nahin dekha