is daur-e-be-dili mein koi baat kaise ho

is daur-e-be-dilī meñ koī baat kaise ho

chāheñ bhī ham to ḳhud se mulāqāt kaise ho

kaaTe nahīñ ga.e to mire haath kaise ho

mere nahīñ ho tum to mire saath kaise ho

patthar baras rahe haiñ to mujh par bhī ā.eñge

maiñ chup rahūñ magar basar-auqāt kaise ho

kuchh dekhte nahīñ ho to biinā ho kis liye

ThanDe paḌe hue ho to jazbāt kaise ho

tum qaidiyoñ kī tarah mire dil meñ ho asiir

phaile nahīñ jahāñ meñ ḳhayālāt kaise ho

is raushnī meñ chehra chhupāoge kab talak

tum māñgte ho raat magar raat kaise ho

sūraj na chāhtā ho to din kis tarah Dhale

bādal hī ruuTh jaa.eñ to barsāt kaise ho

vo chāhte haiñ un ke liye maiñ duā karūñ

shāmil is aarzū meñ mirī zaat kaise ho

bande kā aur ḳhudā kā ta.alluq hī miT chukā

patthar huī zabān munājāt kaise ho

aisā koī jo merī zabāñ bhī samajh sake

tum ajnabī ho tum se mirī baat kaise ho

maiñ apne dushmanoñ ko bhī pahchāntā nahīñ

'shahzād' dostoñ se mulāqāt kaise ho

is daur-e-be-dili mein koi baat kaise ho

chahen bhi hum to KHud se mulaqat kaise ho

kaTe nahin gae to mere hath kaise ho

mere nahin ho tum to mere sath kaise ho

patthar baras rahe hain to mujh par bhi aaenge

main chup rahun magar basar-auqat kaise ho

kuchh dekhte nahin ho to bina ho kis liye

ThanDe paDe hue ho to jazbaat kaise ho

tum qaidiyon ki tarah mere dil mein ho asir

phaile nahin jahan mein KHayalat kaise ho

is raushni mein chehra chhupaoge kab talak

tum mangte ho raat magar raat kaise ho

suraj na chahta ho to din kis tarah Dhale

baadal hi ruTh jaen to barsat kaise ho

wo chahte hain un ke liye main dua karun

shamil is aarzu mein meri zat kaise ho

bande ka aur KHuda ka talluq hi miT chuka

patthar hui zaban munajat kaise ho

aisa koi jo meri zaban bhi samajh sake

tum ajnabi ho tum se meri baat kaise ho

main apne dushmanon ko bhi pahchanta nahin

'shahzad' doston se mulaqat kaise ho