is daur-e-zindagi mein maza hi kahan hai ab

is daur-e-zindagī meñ mazā hī kahāñ hai ab

tum kyā ga.e ki saarā jahāñ bad-gumāñ hai ab

vo ḳhauf hai ki shaam se darvāze band haiñ

sarkār kah rahī hai ki amn-o-amāñ hai ab

aa tū bhī dekh le ki kahānī tamām ho

terā marīz-e-'ishq bahut nā-tavāñ hai ab

chāhat kā 'umr se koī rishta nahīñ janāb

būḌhā hī kab huā thā agar dil javāñ hai ab

gulshan sajāne vaale to tārāj ho ga.e

jis ne chaman ujāḌā vahī bāġhbāñ hai ab

saare jahāñ meñ thā mirī rusvā.ī kā sabab

kyā lutf hai ki merā vahī rāz-dāñ hai ab

gautam kī sarzamīn ye hindostāñ 'azīm

jannat-maqām thā kabhī sho'la-fishāñ hai ab

chāhā thā us ne mujh ko kabhī TuuT kar 'kashish'

guzre hue zamāne kī jo dāstāñ hai ab

is daur-e-zindagi mein maza hi kahan hai ab

tum kya gae ki sara jahan bad-guman hai ab

wo KHauf hai ki sham se darwaze band hain

sarkar kah rahi hai ki amn-o-aman hai ab

aa tu bhi dekh le ki kahani tamam ho

tera mariz-e-'ishq bahut na-tawan hai ab

chahat ka 'umr se koi rishta nahin janab

buDha hi kab hua tha agar dil jawan hai ab

gulshan sajaane wale to taraj ho gae

jis ne chaman ujaDa wahi baghban hai ab

sare jahan mein tha meri ruswai ka sabab

kya lutf hai ki mera wahi raaz-dan hai ab

gautam ki sarzamin ye hindostan 'azim

jannat-maqam tha kabhi sho'la-fishan hai ab

chaha tha us ne mujh ko kabhi TuT kar 'kashish'

guzre hue zamane ki jo dastan hai ab