is daur ka har aadmi ayyar ho gaya

is daur kā har aadmī ayyār ho gayā

apnā zamīr bech ke sardār ho gayā

ḳhidmat kī fikr hai na kisī kā zarā ḳhayāl

ḳhādim hamārī qaum kā ġhaddār ho gayā

samjho ki ḳhauf us ko bhī chiñgāriyoñ kā hai

bārūd kā jo mulk ḳharīdār ho gayā

din raat luT rahī haiñ ġharīboñ kī bastiyāñ

sargarm jab se luuT kā bāzār ho gayā

sar chaḌh ke boltā hai har ik aadmī ke vo

qabze meñ jis ke aaj kā aḳhbār ho gayā

itnī sī baat par maiñ aziyyat-nasīb huuñ

sachchā.ī kā zabān se iz.hār ho gayā

rahbar lage haiñ karne yahāñ rahbarī kā kaam

raahe har ek rāsta dushvār ho gayā

is daur ka har aadmi ayyar ho gaya

apna zamir bech ke sardar ho gaya

KHidmat ki fikr hai na kisi ka zara KHayal

KHadim hamari qaum ka ghaddar ho gaya

samjho ki KHauf us ko bhi chingariyon ka hai

barud ka jo mulk KHaridar ho gaya

din raat luT rahi hain gharibon ki bastiyan

sargarm jab se luT ka bazar ho gaya

sar chaDh ke bolta hai har ek aadmi ke wo

qabze mein jis ke aaj ka aKHbar ho gaya

itni si baat par main aziyyat-nasib hun

sachchai ka zaban se izhaar ho gaya

rahbar lage hain karne yahan rahbari ka kaam

rahe har ek rasta dushwar ho gaya