is daur se KHulus mohabbat wafa na mang

is daur se ḳhulūs mohabbat vafā na maañg

sahrā se koī saaya koī aasrā na maañg

pattoñ ke qahqahoñ meñ sadā-e-bukā na DhūñD

jañgal meñ rah ke shahr kī āb-o-havā na maañg

samjhauta kar ke vaqt se chup-chāp baiTh jā

qātil se zindagī ke abhī ḳhūñ-bahā na maañg

apne ḳhudā se silsila-e-guftugū na toḌ

ho jaa.e jo qubūl to aisī duā na maañg

jā apnī laash ko kahīñ jañgal meñ pheñk aa

is shahr ke amiir se dād-e-vafā na maañg

'ḳhusrav' safīr-e-vaqt se ġham kā mizāj pūchh

maazī kī azmatoñ kā ḳhushī kā pata na maañg

is daur se KHulus mohabbat wafa na mang

sahra se koi saya koi aasra na mang

patton ke qahqahon mein sada-e-buka na DhunD

jangal mein rah ke shahr ki aab-o-hawa na mang

samjhauta kar ke waqt se chup-chap baiTh ja

qatil se zindagi ke abhi KHun-baha na mang

apne KHuda se silsila-e-guftugu na toD

ho jae jo qubul to aisi dua na mang

ja apni lash ko kahin jangal mein phenk aa

is shahr ke amir se dad-e-wafa na mang

'KHusraw' safir-e-waqt se gham ka mizaj puchh

mazi ki azmaton ka KHushi ka pata na mang