is dil se mere ishq ke arman ko nikalo

is dil se mire ishq ke armāñ ko nikālo

tahrīr se aurāq-e-pareshāñ ko nikālo

mumkin hai tahī kar do mujhe har kisī shai se

mumkin ho agar dil se is īmāñ ko nikālo

gar duur talak baab ke imkān nahīñ haiñ

dīvār meñ ik rauzan-e-zindāñ ko nikālo

jis ko hai bharam aaj bhī paimān-e-vafā kā

siine se mire us dil-e-nādāñ ko nikālo

patjhaḌ meñ bhī har gul pe bahār aa.e yaqīnan

gulshan se agar mausam-e-hijrāñ ko nikālo

tab jā ke lagā pāoge dil apnā ḳhizāñ se

pahle to is ummīd-e-bahārāñ ko nikālo

tanhā.ī chalī aa.e khulā jaan ke ik dar

palkoñ se agar yaad ke darbāñ ko nikālo

sahrāoñ meñ phir duur talak saaf hai manzar

āñkhoñ se agar ret ke tūfāñ ko nikālo

āshufta-saroñ par bhī nazar jā.egī 'nāyāb'

gardan se agar sar-ba-garebāñ ko nikālo

is dil se mere ishq ke arman ko nikalo

tahrir se auraq-e-pareshan ko nikalo

mumkin hai tahi kar do mujhe har kisi shai se

mumkin ho agar dil se is iman ko nikalo

gar dur talak bab ke imkan nahin hain

diwar mein ek rauzan-e-zindan ko nikalo

jis ko hai bharam aaj bhi paiman-e-wafa ka

sine se mere us dil-e-nadan ko nikalo

patjhaD mein bhi har gul pe bahaar aae yaqinan

gulshan se agar mausam-e-hijran ko nikalo

tab ja ke laga paoge dil apna KHizan se

pahle to is ummid-e-bahaaran ko nikalo

tanhai chali aae khula jaan ke ek dar

palkon se agar yaad ke darban ko nikalo

sahraon mein phir dur talak saf hai manzar

aankhon se agar ret ke tufan ko nikalo

aashufta-saron par bhi nazar jaegi 'nayab'

gardan se agar sar-ba-gareban ko nikalo