is ehtimam se parwane peshtar na jale

is ehtimām se parvāne peshtar na jale

tavāf-e-sham.a kareñ aur kisī ke par na jale

havā hī aisī chalī hai har ek sochtā hai

tamām shahr jale ek merā ghar na jale

hameñ ye dukh ki numūd-e-sahar na dekh sake

sahar ko ham se shikāyat ki tā-sahar na jale

charāġh-e-shahr nahīñ ham charāġh-e-sahrā haiñ

kise ḳhabar ki jale aur kise ḳhabar na jale

tirī dalīl bajā par ye kaise maanā jaa.e

shajar ko aag lage aur koī samar na jale

shu.ūr-e-qurb kī ye bhī hai ik ajab manzil

ham us ko ġhair kī mahfil meñ dekh kar na jale

ye shaam marg-e-tamannā kī shaam hai 'sādiq'

koī charāġh kisī tāq-e-chashm par na jale

is ehtimam se parwane peshtar na jale

tawaf-e-shama karen aur kisi ke par na jale

hawa hi aisi chali hai har ek sochta hai

tamam shahr jale ek mera ghar na jale

hamein ye dukh ki numud-e-sahar na dekh sake

sahar ko hum se shikayat ki ta-sahar na jale

charagh-e-shahr nahin hum charagh-e-sahra hain

kise KHabar ki jale aur kise KHabar na jale

teri dalil baja par ye kaise mana jae

shajar ko aag lage aur koi samar na jale

shuur-e-qurb ki ye bhi hai ek ajab manzil

hum us ko ghair ki mahfil mein dekh kar na jale

ye sham marg-e-tamanna ki sham hai 'sadiq'

koi charagh kisi taq-e-chashm par na jale