is ek soch mein gum hain KHayal jitne hain

is ek soch meñ gum haiñ ḳhayāl jitne haiñ

javāb utne nahīñ haiñ savāl jitne haiñ

jo sāzishoñ ko kuchalne kī baat kartā hai

bune hue haiñ usī ke ye jaal jitne haiñ

usī kī den haiñ ye sab usī ke tohfe haiñ

hamārī fikr ke shīshe meñ baal jitne haiñ

hamīñ ne chubhte masā.il kī mezbānī kī

hamīñ ne paal rakhe haiñ vabāl jitne haiñ

tumhārī bazm hai ābād ḳhush-mizājoñ se

hamāre saath haiñ āshufta-hāl jitne haiñ

hamāre ahd meñ lafzoñ ne kho diyā mafhūm

uruuj ban ke khaḌe haiñ zavāl jitne haiñ

yaqīñ nahīñ hai tahaffuz kā ab kisī ko 'ḳhumār'

har ek zehn meñ haiñ ehtimāl jitne haiñ

is ek soch mein gum hain KHayal jitne hain

jawab utne nahin hain sawal jitne hain

jo sazishon ko kuchalne ki baat karta hai

bune hue hain usi ke ye jal jitne hain

usi ki den hain ye sab usi ke tohfe hain

hamari fikr ke shishe mein baal jitne hain

hamin ne chubhte masail ki mezbani ki

hamin ne pal rakhe hain wabaal jitne hain

tumhaari bazm hai aabaad KHush-mizajon se

hamare sath hain aashufta-haal jitne hain

hamare ahd mein lafzon ne kho diya mafhum

uruj ban ke khaDe hain zawal jitne hain

yaqin nahin hai tahaffuz ka ab kisi ko 'KHumar'

har ek zehn mein hain ehtimal jitne hain