is imtihan mein tha kabhi us imtihan mein tha

is imtihāñ meñ thā kabhī us imtihāñ meñ thā

maiñ thā zamīñ pe rizq mirā āsmāñ meñ thā

hālāñki koī madd-e-muqābil na thā vahāñ

ik valvala 'ajīb dil-e-nā-tavāñ meñ thā

urdu se merā 'ishq laḌakpan se thā 'ayāñ

maiñ ne jo pahlā ḳhat likhā urdu zabāñ meñ thā

dil yūñhī kah rahā thā vo aa.egā lauT ke

ik silsila yaqīn bhī vahm-o-gumāñ meñ thā

tum ne tajāvuzāt samajh ke girā diyā

ḳhvāboñ kā ik jahān nihāñ us makāñ meñ thā

aḳhlāqiyāt bhuul ga.e the vahāñ ke log

har aadmī paḌā huā sūd-o-ziyāñ meñ thā

sāñseñ rukī huī thiiñ vahāñ sāma'īn kī

sar chaḌh ke boltā thā vo jaadū bayāñ meñ thā

is imtihan mein tha kabhi us imtihan mein tha

main tha zamin pe rizq mera aasman mein tha

haalanki koi madd-e-muqabil na tha wahan

ek walwala 'ajib dil-e-na-tawan mein tha

urdu se mera 'ishq laDakpan se tha 'ayan

main ne jo pahla KHat likha urdu zaban mein tha

dil yunhi kah raha tha wo aaega lauT ke

ek silsila yaqin bhi wahm-o-guman mein tha

tum ne tajawuzat samajh ke gira diya

KHwabon ka ek jahan nihan us makan mein tha

aKHlaqiyat bhul gae the wahan ke log

har aadmi paDa hua sud-o-ziyan mein tha

sansen ruki hui thin wahan sama'in ki

sar chaDh ke bolta tha wo jadu bayan mein tha