is jahan pe haal-e-dil aashkar karna hai

is jahāñ pe hāl-e-dil āshkār karnā hai

aaj ek hāsid ko rāzdār karnā hai

karne haiñ gile us se ranjisheñ bhī rakhnī haiñ

pyaar bhī sitamgar ko be-shumār karnā hai

mausam-e-yaqīñ meñ jo bad-gumān rahtā hai

us se pyaar kā rishta ustuvār karnā hai

jaane vaale āḳhir ko lauT kar bhī aate haiñ

ham ne hashr tak us kā intizār karnā hai

sāmne raho mere yā nigāh se ojhal

shām-e-ġham tujhe maiñ ne ashk-bār karnā hai

asl meñ mohabbat kī sūrateñ yahī do haiñ

be-qarār honā hai be-qarār karnā hai

is jahan pe haal-e-dil aashkar karna hai

aaj ek hasid ko raazdar karna hai

karne hain gile us se ranjishen bhi rakhni hain

pyar bhi sitamgar ko be-shumar karna hai

mausam-e-yaqin mein jo bad-guman rahta hai

us se pyar ka rishta ustuwar karna hai

jaane wale aaKHir ko lauT kar bhi aate hain

hum ne hashr tak us ka intizar karna hai

samne raho mere ya nigah se ojhal

sham-e-gham tujhe main ne ashk-bar karna hai

asl mein mohabbat ki suraten yahi do hain

be-qarar hona hai be-qarar karna hai