is jaur-o-jafa ki duniya mein yun dad-e-wafa di jati hai

is jaur-o-jafā kī duniyā meñ yuuñ dād-e-vafā dī jaatī hai

ma.asūm ko phāñsī miltī hai qātil ko duā dī jaatī hai

kis tarah bhalā qaa.em hogī aise meñ fazā yak-jehtī kī

nafrat ke bhaḌakte sho.aloñ ko dāman se havā dī jaatī hai

duniyā se nirālā ai gulchīñ insāf hai tere gulshan kā

dāman se ulajhte haiñ kāñTe phūloñ ko sazā dī jaatī hai

jo kaam ḳhilāf-e-fitrat ho us kaam meñ istihkām nahīñ

kahne ko to kāġhaz kī kashtī paanī meñ chalā dī jaatī hai

pairāhan-e-kam-ḳhāb-o-resham ik bār-e-garāñ hai jin ke liye

in phuul se nāzuk jismoñ ko zaḳhmoñ kī qabā dī jaatī hai

adbār-o-nahūsat kā bādal us vaqt barastā hai ghar ghar

pākīza rivāyat maazī kī jab dil se bhulā dī jaatī hai

ab haq ke alam-bardāroñ par hai nafs-parastī kā ġhalba

is daur-e-zubūñ meñ har sachchī āvāz dabā dī jaatī hai

jab dāman-e-dil ho jaatā hai ehsās kī daulat se ḳhālī

rusvā.ī-o-zillat qaumoñ kī taqdīr banā dī jaatī hai

aḳhlāq-o-uḳhuvvat kī bāteñ haiñ sab kī zabānoñ par lekin

mansab kī havas meñ aapas kī tafrīq baḌhā dī jaatī hai

aalam hai vo kibr-o-naḳhvat kā jhukte nahīñ rūh-o-dil apne

darbār-e-ḳhudā meñ ai 'nāsir' gardan to jhukā dī jaatī hai

is jaur-o-jafa ki duniya mein yun dad-e-wafa di jati hai

masum ko phansi milti hai qatil ko dua di jati hai

kis tarah bhala qaem hogi aise mein faza yak-jehti ki

nafrat ke bhaDakte shoalon ko daman se hawa di jati hai

duniya se nirala ai gulchin insaf hai tere gulshan ka

daman se ulajhte hain kanTe phulon ko saza di jati hai

jo kaam KHilaf-e-fitrat ho us kaam mein istihkaam nahin

kahne ko to kaghaz ki kashti pani mein chala di jati hai

pairahan-e-kam-KHab-o-resham ek bar-e-garan hai jin ke liye

in phul se nazuk jismon ko zaKHmon ki qaba di jati hai

adbar-o-nahusat ka baadal us waqt barasta hai ghar ghar

pakiza riwayat mazi ki jab dil se bhula di jati hai

ab haq ke alam-bardaron par hai nafs-parasti ka ghalba

is daur-e-zubun mein har sachchi aawaz daba di jati hai

jab daman-e-dil ho jata hai ehsas ki daulat se KHali

ruswai-o-zillat qaumon ki taqdir bana di jati hai

aKHlaq-o-uKHuwwat ki baaten hain sab ki zabanon par lekin

mansab ki hawas mein aapas ki tafriq baDha di jati hai

aalam hai wo kibr-o-naKHwat ka jhukte nahin ruh-o-dil apne

darbar-e-KHuda mein ai 'nasir' gardan to jhuka di jati hai