is kar-e-mohabbat ka bas itna hunar jaana

is kār-e-mohabbat kā bas itnā hunar jaanā

ik baḳhiya udhaḌ jaanā ik zaḳhm kā bhar jaanā

ehsās-e-rifāqat to bas is ke sivā kyā hai

lamhoñ kā Thahar jaanā sadiyoñ kā guzar jaanā

ik ḳhvāb ko nīñdoñ ke saa.e se pare rakhnā

ik yaad kā chupke se siine meñ utar jaanā

kahte haiñ shikast us ko dariyā meñ talātum kī

biphrī huī lahroñ kā sāhil pe bikhar jaanā

chehre pe udāsī kā jo naqsh numāyāñ thā

pahchān liyā maiñ ne tum ne na magar jaanā

sūkhe hue pattoñ ne saath us kā nahīñ chhoḌā

jis peḌ ko logoñ ne be-barg-o-samar jaanā

ai ishq tirī ham par ye kaisī ināyat hai

jī uThnā kabhī ġham se uTh kar kabhī mar jaanā

kaisā hai tirā 'kāzim' dastūr ye ulfat kā

yā pyaar nahīñ karnā yā had se guzar jaanā

is kar-e-mohabbat ka bas itna hunar jaana

ek baKHiya udhaD jaana ek zaKHm ka bhar jaana

ehsas-e-rifaqat to bas is ke siwa kya hai

lamhon ka Thahar jaana sadiyon ka guzar jaana

ek KHwab ko nindon ke sae se pare rakhna

ek yaad ka chupke se sine mein utar jaana

kahte hain shikast us ko dariya mein talatum ki

biphri hui lahron ka sahil pe bikhar jaana

chehre pe udasi ka jo naqsh numayan tha

pahchan liya main ne tum ne na magar jaana

sukhe hue patton ne sath us ka nahin chhoDa

jis peD ko logon ne be-barg-o-samar jaana

ai ishq teri hum par ye kaisi inayat hai

ji uThna kabhi gham se uTh kar kabhi mar jaana

kaisa hai tera 'kazim' dastur ye ulfat ka

ya pyar nahin karna ya had se guzar jaana