isko ghurur-e-ishq ne kya kya bana diya

is ko ġhurūr-e-ishq ne kyā kyā banā diyā

patthar banā diyā kabhī shīsha banā diyā

har zaḳhm-e-dil ko ham ne sajāyā hai is tarah

jugnū banā diyā kabhī taarā banā diyā

maiñ kis zabāñ se shukr ḳhudā kā adā karūñ

jis ne mujhe firāq kā shaidā banā diyā

ab kis ke dar pe jā.ūñ maiñ insāf ke liye

munsif ne qātiloñ ko masīhā banā diyā

jab bhī hameñ mahāz se āvāz dī ga.ī

ham ne lahū se hind kā naqsha banā diyā

us ko ḳhulūs kaise nazar aa.egā 'ashok'

dushman ko intiqām ne andhā banā diyā

is ko ghurur-e-ishq ne kya kya bana diya

patthar bana diya kabhi shisha bana diya

har zaKHm-e-dil ko hum ne sajaya hai is tarah

jugnu bana diya kabhi tara bana diya

main kis zaban se shukr KHuda ka ada karun

jis ne mujhe firaq ka shaida bana diya

ab kis ke dar pe jaun main insaf ke liye

munsif ne qatilon ko masiha bana diya

jab bhi hamein mahaz se aawaz di gai

hum ne lahu se hind ka naqsha bana diya

us ko KHulus kaise nazar aaega 'ashok'

dushman ko intiqam ne andha bana diya