isko itna na munh laga ki ye gham teri hasti miTa bhi sakta hai

is ko itnā na muñh lagā ki ye ġham terī hastī miTā bhī saktā hai

pāltū sher bhuuk lagne par apne mālik ko khā bhī saktā hai

ye to vo dil-figār bāteñ thiiñ jin ko sun kar maiñ ro paḌā varna

sab ke aañsū sameTne vaalā apne aañsū chhupā bhī saktā hai

ab vo bachchoñ sī zid kahāñ mujh meñ zaḳhm-ḳhurda haiñ uñgliyāñ merī

achchhā mauqa hai ye ki tū mujh se apnā dāman chhuḌā bhī saktā hai

munhasir sab hai dil ke mausam par ġham ke sūraj kī to tapish hai vahī

sardiyoñ meñ sukūñ kā paiġhambar garmiyoñ meñ jalā bhī saktā hai

aadmī ko jakaḌ ke rakkhā hai us kī majbūriyoñ ne hī varna

aag par khaultā huā paanī aag kī lau bujhā bhī saktā hai

māddiyyat kā daur hai 'zāhid' paisa bas haath hī kī mail nahīñ

vaqt paḌ jaa.e to yahī fitna aadmī ko nachā bhī saktā hai

is ko itna na munh laga ki ye gham teri hasti miTa bhi sakta hai

paltu sher bhuk lagne par apne malik ko kha bhi sakta hai

ye to wo dil-figar baaten thin jin ko sun kar main ro paDa warna

sab ke aansu sameTne wala apne aansu chhupa bhi sakta hai

ab wo bachchon si zid kahan mujh mein zaKHm-KHurda hain ungliyan meri

achchha mauqa hai ye ki tu mujh se apna daman chhuDa bhi sakta hai

munhasir sab hai dil ke mausam par gham ke suraj ki to tapish hai wahi

sardiyon mein sukun ka paighambar garmiyon mein jala bhi sakta hai

aadmi ko jakaD ke rakkha hai us ki majburiyon ne hi warna

aag par khaulta hua pani aag ki lau bujha bhi sakta hai

maddiyyat ka daur hai 'zahid' paisa bas hath hi ki mail nahin

waqt paD jae to yahi fitna aadmi ko nacha bhi sakta hai