is liye maine na koi minnat-o-fariyaad ki

is liye maiñ ne na koī minnat-o-fariyād kī

dekhī jaatī hī na thī bechārgī sayyād kī

dard ke motī pirotā huuñ ġhazal kī Dor meñ

parvarish kartā huuñ apnī mā’navī aulād kī

rang-o-roġhan merī dīvāroñ pe karte haiñ sabhī

fikr kartā hī nahīñ koī mirī buniyād kī

muddatoñ be-rozgārī ne rulāyā is qadar

āñsuoñ meñ bah ga.ī file mirī asnād kī

baat to ḳhair-ul-varā kī kar rahe haiñ ham magar

kar rahe haiñ pairvī qaum-e-samūd-o-‘ād kī

sach kahūñ to raah meñ kāñTe bichhāo dosto

mustafā.ī huuñ mujhe hājat nahīñ hai daad kī

mere har-sū hai mirī maañ kī du'āoñ kā hisār

rok lī hai raah 'sāgar' jis ne har uftād kī

is liye main ne na koi minnat-o-fariyaad ki

dekhi jati hi na thi bechaargi sayyaad ki

dard ke moti pirota hun ghazal ki Dor mein

parwarish karta hun apni ma’nawi aulad ki

rang-o-roghan meri diwaron pe karte hain sabhi

fikr karta hi nahin koi meri buniyaad ki

muddaton be-rozgari ne rulaya is qadar

aansuon mein bah gai file meri asnad ki

baat to KHair-ul-wara ki kar rahe hain hum magar

kar rahe hain pairwi qaum-e-samud-o-‘ad ki

sach kahun to rah mein kanTe bichhao dosto

mustafai hun mujhe hajat nahin hai dad ki

mere har-su hai meri man ki du'aon ka hisar

rok li hai rah 'sagar' jis ne har uftad ki