is liye mausam suhana ho gaya

is liye mausam suhānā ho gayā

chāñd ke ghar ānā-jānā ho gayā

kyoñ bichhaḌtā hī nahīñ mujh se kabhī

vo jise bichhḌe zamānā ho gayā

qismatoñ vaalā hai yaaro vo shajar

jo parindoñ kā Thikānā ho gayā

tiir karne ko tumhāre kāmyāb

dil mirā ḳhud hī nishānā ho gayā

bārhā merā manā lenā unheñ

ruuTh jaane kā bahānā ho gayā

un kī āñkhoñ meñ rahā karte the ham

chhoḌiye qissa purānā ho gayā

ho gayā iqrār jab inkār se

aur bhī mushkil nibhānā ho gayā

dil ke kone meñ chhupā rahtā thā jo

ab vo bachcha bhī siyānā ho gayā

is liye mausam suhana ho gaya

chand ke ghar aana-jaana ho gaya

kyon bichhaDta hi nahin mujh se kabhi

wo jise bichhDe zamana ho gaya

qismaton wala hai yaro wo shajar

jo parindon ka Thikana ho gaya

tir karne ko tumhaare kaamyab

dil mera KHud hi nishana ho gaya

barha mera mana lena unhen

ruTh jaane ka bahana ho gaya

un ki aankhon mein raha karte the hum

chhoDiye qissa purana ho gaya

ho gaya iqrar jab inkar se

aur bhi mushkil nibhana ho gaya

dil ke kone mein chhupa rahta tha jo

ab wo bachcha bhi siyana ho gaya