is liye zer-e-falak be-sabab aazar hai husn

is liye zer-e-falak be-sabab āzār hai husn

jaa.e to jaa.e kahāñ ishq ki sarkār hai husn

bulbul-e-soḳhta-sāmāñ se sunā hai maiñ ne

ishq ik ātish-e-be-sho.ala hai gulzār hai husn

saaf aatā hai nazar dīda-e-bīnā ko yahī

ishq iqrār-e-haqīqat hai aur iz.hār hai husn

jalva-e-sham.a se parvānoñ ko hosh aatā hai

ishq kirdār sahī jauhar-e-kirdār hai husn

ishq bechāra hī āgāh nahīñ hai varna

roz-e-mīsāq se ḳhud is kā talabgār hai husn

sūrat-e-dā.era-e-kaun-o-makāñ hai is se

ishq nuqta hai aur is nuqte kī parkār hai husn

cholī dāman kā azal se hai 'amīñ' saath in kā

husn kā ishq hai aur ishq kā me.aar hai husn

is liye zer-e-falak be-sabab aazar hai husn

jae to jae kahan ishq ki sarkar hai husn

bulbul-e-soKHta-saman se suna hai main ne

ishq ek aatish-e-be-shoala hai gulzar hai husn

saf aata hai nazar dida-e-bina ko yahi

ishq iqrar-e-haqiqat hai aur izhaar hai husn

jalwa-e-shama se parwanon ko hosh aata hai

ishq kirdar sahi jauhar-e-kirdar hai husn

ishq bechaara hi aagah nahin hai warna

roz-e-misaq se KHud is ka talabgar hai husn

surat-e-daera-e-kaun-o-makan hai is se

ishq nuqta hai aur is nuqte ki parkar hai husn

choli daman ka azal se hai 'amin' sath in ka

husn ka ishq hai aur ishq ka mear hai husn