is mahina bhar kahan tha saqiya achchhi tarah

is mahīna bhar kahāñ thā sāqiyā achchhī tarah

aa idhar aa iid to mil leñ zarā achchhī tarah

uñgliyāñ kānoñ meñ rakh kar ai musāfir sun zarā

aa rahī hai saaf āvāz-e-darā achchhī tarah

chashm-e-mūsā lā sakī ik us ke jalve kī na taab

chashm-e-dil se jis ko dekhā bār-hā achchhī tarah

fāsla aisā nahīñ kuchh arsh kī zanjīr se

kyā kahūñ baḌhtā nahīñ dast-e-duā achchhī tarah

ahl-e-sūrat ko nahīñ hai achchhī sīrat se ġharaz

achchhī sūrat chāhiye achchhī adā achchhī tarah

shāhidān-e-lāla-o-gul kī ḳhabar laa.ī hai kuchh

saal bhar ke ba.ad aa.ī ai sabā achchhī tarah

siikh legī bal kī lenā tā-kamar aane to do

bal abhī kartī nahīñ zulf-e-dotā achchhī tarah

shīsha-o-jām-o-subū bhar le mai-e-gul-rañg se

aaj saaqī ghir ke aa.ī hai ghaTā achchhī tarah

lete haiñ ahl-e-junūñ kyā kyā tasavvur ke maze

aañkh se pariyoñ ko dekhā bār-hā achchhī tarah

de rahī hai us kī ḳhāmoshī sadā-e-dūr-bāsh

ye nahīñ kahtā ki 'nazm'-e-mubtalā achchhī tarah

is mahina bhar kahan tha saqiya achchhi tarah

aa idhar aa id to mil len zara achchhi tarah

ungliyan kanon mein rakh kar ai musafir sun zara

aa rahi hai saf aawaz-e-dara achchhi tarah

chashm-e-musa la saki ek us ke jalwe ki na tab

chashm-e-dil se jis ko dekha bar-ha achchhi tarah

fasla aisa nahin kuchh arsh ki zanjir se

kya kahun baDhta nahin dast-e-dua achchhi tarah

ahl-e-surat ko nahin hai achchhi sirat se gharaz

achchhi surat chahiye achchhi ada achchhi tarah

shahidan-e-lala-o-gul ki KHabar lai hai kuchh

sal bhar ke baad aai ai saba achchhi tarah

sikh legi bal ki lena ta-kamar aane to do

bal abhi karti nahin zulf-e-dota achchhi tarah

shisha-o-jam-o-subu bhar le mai-e-gul-rang se

aaj saqi ghir ke aai hai ghaTa achchhi tarah

lete hain ahl-e-junun kya kya tasawwur ke maze

aankh se pariyon ko dekha bar-ha achchhi tarah

de rahi hai us ki KHamoshi sada-e-dur-bash

ye nahin kahta ki 'nazm'-e-mubtala achchhi tarah