is qadar bhi dil nahin TuTa hua

is qadar bhī dil nahīñ TuuTā huā

kuchh simaT saktā na ho bikhrā huā

kab talak ḳhud ko yahī kahtā rahūñ

dil pe mat le jo huā achchhā huā

kaun se manzar pe Thahre aañkh bhī

sab nazar aatā hai bas dekhā huā

ham yaqīñ kar ke use paḌhte rahe

jo bhī thā harf-e-gumāñ likkhā huā

sab marāsim rakh gayā dahlīz par

dil giraftār-e-anā hotā huā

jaane kis ġham ko rihā.ī de rahe

aañkh meñ jo ashk hai aayā huā

vaqt kitne zor se hañsne lagā

ishq jab shartoñ pe āmāda huā

haa.e tark-e-ishq par us kā ye tanz

der hī se haañ magar achchhā huā

ab use ye bhī nahīñ hai yaad tak

hai vo kis kis ko kahāñ bhūlā huā

vo jise kuchh bhī na hotā thā use

baad tere pūchh mat kyā kyā huā

chal 'amar' us shaḳhs ko jā kar mileñ

vo nahīñ miltā agar to kyā huā

is qadar bhi dil nahin TuTa hua

kuchh simaT sakta na ho bikhra hua

kab talak KHud ko yahi kahta rahun

dil pe mat le jo hua achchha hua

kaun se manzar pe Thahre aankh bhi

sab nazar aata hai bas dekha hua

hum yaqin kar ke use paDhte rahe

jo bhi tha harf-e-guman likkha hua

sab marasim rakh gaya dahliz par

dil giraftar-e-ana hota hua

jaane kis gham ko rihai de rahe

aankh mein jo ashk hai aaya hua

waqt kitne zor se hansne laga

ishq jab sharton pe aamada hua

hae tark-e-ishq par us ka ye tanz

der hi se han magar achchha hua

ab use ye bhi nahin hai yaad tak

hai wo kis kis ko kahan bhula hua

wo jise kuchh bhi na hota tha use

baad tere puchh mat kya kya hua

chal 'amar' us shaKHs ko ja kar milen

wo nahin milta agar to kya hua