is qadar gham mera bebak nahin ho sakta

is qadar ġham mirā bebāk nahīñ ho saktā

dāman-e-husn kabhī chaak nahīñ ho saktā

mai kī talḳhī bhī musallam tirā kahnā bhī durust

nāsehā be-piye idrāk nahīñ ho saktā

tā-abad ziist rahegī yūñhī barbād-e-ḳhirad

gar junūñ sāhib-e-idrāk nahīñ ho saktā

kam se kam zulm bhī mahrūm-e-masarrat to rahe

dīda-e-ġham mirā namnāk nahīñ ho saktā

mirā pindār-e-nazar aap ke jalvoñ kā ġhurūr

hai vo jhagḌā jo kabhī paak nahīñ ho saktā

aap is dil kī adā se abhī vāqif hī nahīñ

jal to jaatā hai magar ḳhaak nahīñ ho saktā

un ke mamnūn-e-sitam apnī vafāoñ se gila

kaun sā ġham tah-e-aflāk nahīñ ho saktā

kah hī Daalā nigah-e-nāz kā sab raaz 'shafīq'

aap sā bhī koī bebāk nahīñ ho saktā

is qadar gham mera bebak nahin ho sakta

daman-e-husn kabhi chaak nahin ho sakta

mai ki talKHi bhi musallam tera kahna bhi durust

naseha be-piye idrak nahin ho sakta

ta-abad zist rahegi yunhi barbaad-e-KHirad

gar junun sahib-e-idrak nahin ho sakta

kam se kam zulm bhi mahrum-e-masarrat to rahe

dida-e-gham mera namnak nahin ho sakta

mera pindar-e-nazar aap ke jalwon ka ghurur

hai wo jhagDa jo kabhi pak nahin ho sakta

aap is dil ki ada se abhi waqif hi nahin

jal to jata hai magar KHak nahin ho sakta

un ke mamnun-e-sitam apni wafaon se gila

kaun sa gham tah-e-aflak nahin ho sakta

kah hi Dala nigah-e-naz ka sab raaz 'shafiq'

aap sa bhi koi bebak nahin ho sakta