is qadar ghaur se us shaKHs ko dekha na karo

is qadar ġhaur se us shaḳhs ko dekhā na karo

vo bhare ghar kā hai 'aadī use tanhā na karo

shor meñ dab ke na rah jaa.e tumhārī āvāz

shahr meñ khaao agar zaḳhm to chīḳhā na karo

gar vo 'aadī na rahā dhuup na sah pā.egā

chand lamhoñ kā kisī shaḳhs pe saaya na karo

dostoñ ne jo diye haiñ tumheñ palkoñ ke liye

aise motī sar-e-mahfil to luTāyā na karo

zard chehre pe jo ġhāze kā gulābī-pan hai

bhīgī āñkhoñ se tum is rang ko rusvā na karo

sūkhe pattoñ kī sadāoñ se karo samjhauta

vaqt se pahle bahāroñ kī tamanna na karo

maañd paḌ jaa.e 'humairā' na damak chehroñ kī

pichhle ḳhvāboñ ko sar-e-bazm sunāyā na karo

is qadar ghaur se us shaKHs ko dekha na karo

wo bhare ghar ka hai 'adi use tanha na karo

shor mein dab ke na rah jae tumhaari aawaz

shahr mein khao agar zaKHm to chiKHa na karo

gar wo 'adi na raha dhup na sah paega

chand lamhon ka kisi shaKHs pe saya na karo

doston ne jo diye hain tumhein palkon ke liye

aise moti sar-e-mahfil to luTaya na karo

zard chehre pe jo ghaze ka gulabi-pan hai

bhigi aankhon se tum is rang ko ruswa na karo

sukhe patton ki sadaon se karo samjhauta

waqt se pahle bahaaron ki tamanna na karo

mand paD jae 'humaira' na damak chehron ki

pichhle KHwabon ko sar-e-bazm sunaya na karo