is qadar KHud pe hum jafa na karen

is qadar ḳhud pe ham jafā na kareñ

jism ko jaan se judā na kareñ

ashk az chashm-e-man judā nashivad

aap aisī kabhī duā na kareñ

aao ahd-e-vafā kareñ donoñ

aur ahd-e-vafā vafā na kareñ

phuul ban kar mahakne lagte haiñ

aap zaḳhmoñ ko yuuñ chhuā na kareñ

duur maanā zamīn hai us se

āsmāñ se magar kahā na kareñ

aur bhī kuchh mazīd dahkegī

aag ko yuuñ havā diyā na kareñ

kaise bhūleñge mujh ko un se kaho

zikr itnā mirā kiyā na kareñ

ham bhī insān haiñ farishte nahīñ

ye to mumkin nahīñ ḳhatā na kareñ

is qadar KHud pe hum jafa na karen

jism ko jaan se juda na karen

ashk az chashm-e-man juda nashiwad

aap aisi kabhi dua na karen

aao ahd-e-wafa karen donon

aur ahd-e-wafa wafa na karen

phul ban kar mahakne lagte hain

aap zaKHmon ko yun chhua na karen

dur mana zamin hai us se

aasman se magar kaha na karen

aur bhi kuchh mazid dahkegi

aag ko yun hawa diya na karen

kaise bhulenge mujh ko un se kaho

zikr itna mera kiya na karen

hum bhi insan hain farishte nahin

ye to mumkin nahin KHata na karen