is qadar kin jazba-e-ulfat ki parda-poshiyan

is qadar kiiñ jazba-e-ulfat kī parda-poshiyāñ

Das rahī haiñ aaj ḳhud mujh ko mirī ḳhāmoshiyāñ

kaun se sahrā ke kāñTe bichh ga.e haiñ raah meñ

kaun sī manzil pe aa kar luT ga.iiñ gul-poshiyāñ

kyā huā vo soz-e-furqat aur surūr-e-intizār

dil se terī yaad kī din raat ham-āġhoshiyāñ

har ik aahaT par tire aane kā hotā thā gumāñ

ḳhaak meñ sab mil ga.iiñ haiñ vo hama-tan-goshiyāñ

phīkī phīkī ho ga.ī hai ab tirī tahrīr bhī

ranjish-e-paiham ne terī chhīn liiñ mai-noshiyāñ

bad-gumānī kī havā se gul na ho sham-e-vafā

zehn-o-dil meñ ho rahī haiñ aaj ye sargoshiyāñ

umr bhar kā ġham banī hai 'nūr' vo pal kī ḳhushī

hosh ke aalam meñ bhī chhāne lagīñ be-hoshiyāñ

is qadar kin jazba-e-ulfat ki parda-poshiyan

Das rahi hain aaj KHud mujh ko meri KHamoshiyan

kaun se sahra ke kanTe bichh gae hain rah mein

kaun si manzil pe aa kar luT gain gul-poshiyan

kya hua wo soz-e-furqat aur surur-e-intizar

dil se teri yaad ki din raat ham-aghoshiyan

har ek aahaT par tere aane ka hota tha guman

KHak mein sab mil gain hain wo hama-tan-goshiyan

phiki phiki ho gai hai ab teri tahrir bhi

ranjish-e-paiham ne teri chhin lin mai-noshiyan

bad-gumani ki hawa se gul na ho sham-e-wafa

zehn-o-dil mein ho rahi hain aaj ye sargoshiyan

umr bhar ka gham bani hai 'nur' wo pal ki KHushi

hosh ke aalam mein bhi chhane lagin be-hoshiyan