is rah-e-talab mein main ai dil jata hun kahan malum nahin

is rāh-e-talab meñ maiñ ai dil jaatā huuñ kahāñ ma.alūm nahīñ

apnā bhī pata ma.alūm nahīñ manzil kā nishāñ ma.alūm nahīñ

ham laakh chhupā.eñge ai dil is jazb-e-mohabbat ko lekin

ai josh-e-junūñ phir aatī hai kyoñ lab pe fuġhāñ ma.alūm nahīñ

bāteñ kuchh un se aisī huiiñ ham aql-o-ḳhirad sab kho baiThe

qissa ko bayāñ karne ke liye andāz-e-bayāñ ma.alūm nahīñ

samjhā thā bahāreñ hī hoñgī gulshan meñ hamesha chāroñ taraf

shāyad ki tujhe barq-e-larzāñ andāz-e-ḳhizāñ ma.alūm nahīñ

allāh re shauq-e-gul-bosī itnā bhī nahīñ hai mujh ko pata

kāñToñ meñ ulajh kar bhī ḳhush hai kyoñ merī zabāñ ma.alūm nahīñ

har baar bhulā.ūñ maiñ lekin ai rū-e-hasīñ zulf-e-mushkīñ

jaatā hai dil-e-pur-shauq-talab kyoñ sū-e-butāñ ma.alūm nahīñ

aahoñ se use taskīn nahīñ ashkoñ se 'nasīm' ab chain nahīñ

kyā chiiz bhalā phir chāhtā hai ye qalb-e-tapāñ ma.alūm nahīñ

is rah-e-talab mein main ai dil jata hun kahan malum nahin

apna bhi pata malum nahin manzil ka nishan malum nahin

hum lakh chhupaenge ai dil is jazb-e-mohabbat ko lekin

ai josh-e-junun phir aati hai kyon lab pe fughan malum nahin

baaten kuchh un se aisi huin hum aql-o-KHirad sab kho baiThe

qissa ko bayan karne ke liye andaz-e-bayan malum nahin

samjha tha bahaaren hi hongi gulshan mein hamesha chaaron taraf

shayad ki tujhe barq-e-larzan andaz-e-KHizan malum nahin

allah re shauq-e-gul-bosi itna bhi nahin hai mujh ko pata

kanTon mein ulajh kar bhi KHush hai kyon meri zaban malum nahin

har bar bhulaun main lekin ai ru-e-hasin zulf-e-mushkin

jata hai dil-e-pur-shauq-talab kyon su-e-butan malum nahin

aahon se use taskin nahin ashkon se 'nasim' ab chain nahin

kya chiz bhala phir chahta hai ye qalb-e-tapan malum nahin