is se pahle ki kisi ghaT utare jate

is se pahle ki kisī ghaaT utāre jaate

ham hī betāb the ham muft meñ maare jaate

had idrāk se aage thī tire qurb kī shaam

DhūñDne tujh ko kahāñ chāñd-sitāre jaate

tū ne ḳhud apnī mohabbat kā bharam khol diyā

varna ham pās-e-muravvat meñ hī maare jaate

tujh se mansūb hue haiñ to ye hasrat hī rahī

ham kabhī apne havāle se pukāre jaate

saḳht pahra thā tire hāshiya-bardāroñ kā

ham vahāñ kis kī sifārish ke sahāre jaate

tū ne ḳhud halqa-e-amvāj se muñh moḌ liyā

duur tak varna tire saath kināre jaate

mish.aleñ ġham kī farozāñ thiiñ har ik ghar meñ 'salīm'

kis kī dahlīz pe ham dard ke maare jaate

is se pahle ki kisi ghaT utare jate

hum hi betab the hum muft mein mare jate

had idrak se aage thi tere qurb ki sham

DhunDne tujh ko kahan chand-sitare jate

tu ne KHud apni mohabbat ka bharam khol diya

warna hum pas-e-murawwat mein hi mare jate

tujh se mansub hue hain to ye hasrat hi rahi

hum kabhi apne hawale se pukare jate

saKHt pahra tha tere hashiya-bardaron ka

hum wahan kis ki sifarish ke sahaare jate

tu ne KHud halqa-e-amwaj se munh moD liya

dur tak warna tere sath kinare jate

mishalen gham ki farozan thin har ek ghar mein 'salim'

kis ki dahliz pe hum dard ke mare jate