اس سے پہلے کہ مزاج اپنا سمندر بدلے

اس سے پہلے کہ مزاج اپنا سمندر بدلے

سست رفتار سفینوں نے بھی تیور بدلے

بن گئی تیغ رواں موج ہوائے ہجراں

شام آئی تو تری یاد نے پیکر بدلے

موسم تازہ کی آہٹ ہے مرے کانوں میں

برگ شاخوں نے پرندوں نے نئے پر بدلے

میری مٹی میں ہے جذب اس کے بدن کی خوشبو

نیند کا لطف ہی اڑ جائے جو بستر بدلے

صدف دل میں جو گوہر تھا وہی ہے اب بھی

یوں تو دریاؤں نے ہر روز شناور بدلے

آج بھی عکس وہی ہے جو بہت پہلے تھا

آئنہ خانے میں آئینے تو اکثر بدلے

نئے الفاظ و معانی کی طلب ہے ساحلؔ

غیر ممکن ہے مزاج اپنا سخنور بدلے