is se pahle ki mizaj apna samundar badle

is se pahle ki mizāj apnā samundar badle

sust raftār safīnoñ ne bhī tevar badle

ban ga.ī teġh-e-ravāñ mauj-e-havā-e-hijrāñ

shaam aa.ī to tirī yaad ne paikar badle

mausam-e-tāza kī aahaT hai mire kānoñ meñ

barg shāḳhoñ ne parindoñ ne na.e par badle

merī miTTī meñ hai jazb us ke badan kī ḳhushbū

niiñd kā lutf hī uḌ jaa.e jo bistar badle

sadaf-e-dil meñ jo gauhar thā vahī hai ab bhī

yuuñ to dariyāoñ ne har roz shanāvar badle

aaj bhī aks vahī hai jo bahut pahle thā

ā.ina-ḳhāne meñ ā.īne to aksar badle

na.e alfāz-o-ma.ānī kī talab hai 'sāhil'

ġhair-mumkin hai mizāj apnā suḳhanvar badle

is se pahle ki mizaj apna samundar badle

sust raftar safinon ne bhi tewar badle

ban gai tegh-e-rawan mauj-e-hawa-e-hijran

sham aai to teri yaad ne paikar badle

mausam-e-taza ki aahaT hai mere kanon mein

barg shaKHon ne parindon ne nae par badle

meri miTTi mein hai jazb us ke badan ki KHushbu

nind ka lutf hi uD jae jo bistar badle

sadaf-e-dil mein jo gauhar tha wahi hai ab bhi

yun to dariyaon ne har roz shanawar badle

aaj bhi aks wahi hai jo bahut pahle tha

aaina-KHane mein aaine to aksar badle

nae alfaz-o-maani ki talab hai 'sahil'

ghair-mumkin hai mizaj apna suKHanwar badle