is shahr-e-be-charagh mein do-chaar hum hi hain

is shahr-e-be-charāġh meñ do-chār ham hī haiñ

rahte haiñ vo jo sūrat-e-anvār ham hī haiñ

kuchh is nazar se log hameñ dekhne lage

jaise ki aaj sub.h kā aḳhbār ham hī haiñ

kal tak tumhārī aañkh ke taare bhī ham hī the

aur aaj un meñ chubhte hue ḳhaar ham hī haiñ

jo nā-ḳhudā-e-vaqt the sāhil se jā lage

maujoñ se ab bhī barsar-e-paikār ham hī haiñ

qurbāniyāñ hamārī koī dekhtā nahīñ

un kī nazar meñ aaj bhī ġhaddār ham hī haiñ

qaa.em hai is se apnī hadoñ kā vaqār aaj

donoñ ke biich shīshe kī dīvār ham hī haiñ

'irfān' ham ko vaqt ne pāmāl kar diyā

tahzīb-e-nau ke dosto me.amār ham hī haiñ

is shahr-e-be-charagh mein do-chaar hum hi hain

rahte hain wo jo surat-e-anwar hum hi hain

kuchh is nazar se log hamein dekhne lage

jaise ki aaj subh ka aKHbar hum hi hain

kal tak tumhaari aankh ke tare bhi hum hi the

aur aaj un mein chubhte hue KHar hum hi hain

jo na-KHuda-e-waqt the sahil se ja lage

maujon se ab bhi barsar-e-paikar hum hi hain

qurbaniyan hamari koi dekhta nahin

un ki nazar mein aaj bhi ghaddar hum hi hain

qaem hai is se apni hadon ka waqar aaj

donon ke bich shishe ki diwar hum hi hain

'irfan' hum ko waqt ne pamal kar diya

tahzib-e-nau ke dosto meamar hum hi hain