is shahr-e-be-KHata mein KHatawar main hi hun

is shahr-e-be-ḳhatā meñ ḳhatāvār maiñ hī huuñ

ya.anī guloñ ke biich meñ ik ḳhaar maiñ hī huuñ

luuTā gayā thā kal jo sar-e-rāh qāfila

us qāfile kā qāfila-sālār maiñ hī huuñ

sach bolne ke jurm meñ jis ko sazā milī

dekho vo ḳhush-nasīb gunah-gār maiñ hī huuñ

ahl-e-vafā to pahle bhī chaḌhte the daar par

aaj is matā.a-e-haq kā talabgār maiñ hī huuñ

uf tak na kī ho jis ne mohabbat kī raah meñ

rote haiñ jis par ab dar-o-dīvār maiñ hī huuñ

dekhā hai jis ne daur-e-havādis qarīb se

pathrā ga.ī jo nargis-e-bīmār maiñ hī huuñ

letā huuñ rab kā naam musībat meñ aan kar

dair-o-haram ke biich giraftār maiñ hī huuñ

'ālam' ḳhudā ke vāste kah do jo dil meñ hai

bazm-e-suḳhan meñ aaj kā sardār maiñ hī huuñ

is shahr-e-be-KHata mein KHatawar main hi hun

yani gulon ke bich mein ek KHar main hi hun

luTa gaya tha kal jo sar-e-rah qafila

us qafile ka qafila-salar main hi hun

sach bolne ke jurm mein jis ko saza mili

dekho wo KHush-nasib gunah-gar main hi hun

ahl-e-wafa to pahle bhi chaDhte the dar par

aaj is mataa-e-haq ka talabgar main hi hun

uf tak na ki ho jis ne mohabbat ki rah mein

rote hain jis par ab dar-o-diwar main hi hun

dekha hai jis ne daur-e-hawadis qarib se

pathra gai jo nargis-e-bimar main hi hun

leta hun rab ka nam musibat mein aan kar

dair-o-haram ke bich giraftar main hi hun

'alam' KHuda ke waste kah do jo dil mein hai

bazm-e-suKHan mein aaj ka sardar main hi hun