is shahr-e-nigaran ki kuchh baat nirali hai

is shahr-e-nigārāñ kī kuchh baat nirālī hai

har haath meñ daulat hai har aañkh savālī hai

shāyad ġham-e-daurāñ kā maarā koī aa jaa.e

is vāste sāġhar meñ thoḌī sī bacha lī hai

ham logoñ se ye duniyā badlī na ga.ī lekin

ham ne na.ī duniyā kī buniyād to Daalī hai

us aañkh se tum ḳhud ko kis tarah chhupāoge

jo aañkh pas-e-parda bhī dekhne vaalī hai

jab ġhaur se dekhī hai tasvīr tirī maiñ ne

mahsūs huā jaise ab bolne vaalī hai

duniyā jise kahtī hai be-rāh-ravī 'rāhī'

jiine ke liye ham ne vo raah nikālī hai

is shahr-e-nigaran ki kuchh baat nirali hai

har hath mein daulat hai har aankh sawali hai

shayad gham-e-dauran ka mara koi aa jae

is waste saghar mein thoDi si bacha li hai

hum logon se ye duniya badli na gai lekin

hum ne nai duniya ki buniyaad to Dali hai

us aankh se tum KHud ko kis tarah chhupaoge

jo aankh pas-e-parda bhi dekhne wali hai

jab ghaur se dekhi hai taswir teri main ne

mahsus hua jaise ab bolne wali hai

duniya jise kahti hai be-rah-rawi 'rahi'

jine ke liye hum ne wo rah nikali hai