is shahr ke logon mein wafa hai ki nahin hai

is shahr ke logoñ meñ vafā hai ki nahīñ hai

darvāza kisī ghar kā khulā hai ki nahīñ hai

lauT aa.ī haiñ chilman hī se Takrā ke nigāheñ

vo jān-e-hayā apnī jagah hai ki nahīñ hai

maujeñ mujhe sāhil kī taraf lā to rahī haiñ

ma.alūm nahīñ us kī razā hai ki nahīñ hai

yaaro mire dam tak to baḌā shor thā lekin

vīrāne meñ ab koī sadā hai ki nahīñ hai

jis daur meñ insāf ho qātil kā taraf-dār

us daur meñ jiinā bhī sazā hai ki nahīñ hai

ai bhūlne vaale mujhe itnā to batā de

is dard kī duniyā meñ davā hai ki nahīñ hai

manzil pe pahuñchne kā irāda hai to 'shādāñ'

ye fikr na kar rāh-numā hai ki nahīñ hai

is shahr ke logon mein wafa hai ki nahin hai

darwaza kisi ghar ka khula hai ki nahin hai

lauT aai hain chilman hi se Takra ke nigahen

wo jaan-e-haya apni jagah hai ki nahin hai

maujen mujhe sahil ki taraf la to rahi hain

malum nahin us ki raza hai ki nahin hai

yaro mere dam tak to baDa shor tha lekin

virane mein ab koi sada hai ki nahin hai

jis daur mein insaf ho qatil ka taraf-dar

us daur mein jina bhi saza hai ki nahin hai

ai bhulne wale mujhe itna to bata de

is dard ki duniya mein dawa hai ki nahin hai

manzil pe pahunchne ka irada hai to 'shadan'

ye fikr na kar rah-numa hai ki nahin hai