is shahr mein hasin the jitne baDe baDe

is shahr meñ hasīn the jitne baḌe baḌe

patthar hue haiñ raah meñ us kī khaḌe khaḌe

muñh lag na ham charāġhoñ ke ai sar-phirī havā

dekhe haiñ ham ne tujh se bhī dushman baḌe baḌe

jo log ek-dūje pe karte the jaañ nisār

kis kī nazar lagī hai ki sab haiñ laḌe laḌe

kab maiñ ne ye kahā hai ki baiTho mire qarīb

bas dekh jaao duur se mujh ko khaḌe khaḌe

apnī nazar meñ sher vo zevar se kam nahīñ

jis meñ hoñ harf jaise nagīne jaḌe jaḌe

Thokar lagā ke un kā muqaddar sañvār do

be-kār ho na jaa.eñ ye patthar paḌe paḌe

tum merī maut dekh ke rone lage 'jamīl'

guzre haiñ mujh pe is se bhī lamhe kaḌe kaḌe

is shahr mein hasin the jitne baDe baDe

patthar hue hain rah mein us ki khaDe khaDe

munh lag na hum charaghon ke ai sar-phiri hawa

dekhe hain hum ne tujh se bhi dushman baDe baDe

jo log ek-duje pe karte the jaan nisar

kis ki nazar lagi hai ki sab hain laDe laDe

kab main ne ye kaha hai ki baiTho mere qarib

bas dekh jao dur se mujh ko khaDe khaDe

apni nazar mein sher wo zewar se kam nahin

jis mein hon harf jaise nagine jaDe jaDe

Thokar laga ke un ka muqaddar sanwar do

be-kar ho na jaen ye patthar paDe paDe

tum meri maut dekh ke rone lage 'jamil'

guzre hain mujh pe is se bhi lamhe kaDe kaDe