is surat-e-haalat mein bhi sabr karo ho

is sūrat-e-hālāt meñ bhī sabr karo ho

tum 'sa.adiya' biibī na jiyo ho na maro ho

sar apnā kisī sang se Takrātī ho pahle

phir baa'd meñ patthar vahī siine pe dharo ho

māñgī thiiñ duā.eñ kisī nādīda ufuq kī

ab raushnī-e-tab.a kī vus.at se Daro ho

mahfil meñ ho tanhā.ī kī chādar ko sañbhāle

tanhā.ī ke aalam meñ kise yaad karo ho

vo shaḳhs vahī hai magar atvār na.e haiñ

mohtāt sī ik raa.e kā iz.hār karo ho

kyā tum ne hadaf DhūñD liyā zor-e-bayāñ kā

kyā apne kiye par kabhī tanqīd karo ho

jab hausla himmat hai to kyā ḳhauf kisī kā

ye dard to mīrās hai kyā is se Daro ho

har ek sahelī kī jo āñkhoñ meñ namī hai

kyā apne dupaTTe meñ use jazb karo ho

ab 'sa.adiya' us kī koī tāvīl to hogī

jhulsī ho kahīñ dhuup meñ yuuñ abr karo ho

is surat-e-haalat mein bhi sabr karo ho

tum 'sadiya' bibi na jiyo ho na maro ho

sar apna kisi sang se Takraati ho pahle

phir ba'd mein patthar wahi sine pe dharo ho

mangi thin duaen kisi nadida ufuq ki

ab raushni-e-taba ki wusat se Daro ho

mahfil mein ho tanhai ki chadar ko sanbhaale

tanhai ke aalam mein kise yaad karo ho

wo shaKHs wahi hai magar atwar nae hain

mohtat si ek rae ka izhaar karo ho

kya tum ne hadaf DhunD liya zor-e-bayan ka

kya apne kiye par kabhi tanqid karo ho

jab hausla himmat hai to kya KHauf kisi ka

ye dard to miras hai kya is se Daro ho

har ek saheli ki jo aankhon mein nami hai

kya apne dupaTTe mein use jazb karo ho

ab 'sadiya' us ki koi tawil to hogi

jhulsi ho kahin dhup mein yun abr karo ho