is taraf se us taraf tak KHushk o tar pani mein hai

is taraf se us taraf tak ḳhushk o tar paanī meñ hai

ab samundar se samundar tak nazar paanī meñ hai

merī āñkhoñ meñ idhar manzar hai apnī maut kā

aur koī Dūbne vaalā udhar paanī meñ hai

jaane kab mere samundar ko koī sāhil mile

kab se merā jism sargarm-e-safar paanī meñ hai

kashti-e-anfās zer-e-āb bhī hai shola-bār

tah-ba-tah jaise koī mauj-e-sharar paanī meñ hai

jal gayā hotā shuā-e-mehr se ye shahr bhī

ḳhairiyat guzrī ki ḳhvāboñ kā nagar paanī meñ hai

is bulandī se lagā.ūñ kis taraf ab maiñ chhalāñg

ek dar hai dasht meñ to ek dar paanī meñ hai

ho chuke haiñ kab ke chaknā-chūr ā.īne sabhī

ye to 'mohsin' apnā hī aks-e-nazar paanī meñ hai

is taraf se us taraf tak KHushk o tar pani mein hai

ab samundar se samundar tak nazar pani mein hai

meri aankhon mein idhar manzar hai apni maut ka

aur koi Dubne wala udhar pani mein hai

jaane kab mere samundar ko koi sahil mile

kab se mera jism sargarm-e-safar pani mein hai

kashti-e-anfas zer-e-ab bhi hai shola-bar

tah-ba-tah jaise koi mauj-e-sharar pani mein hai

jal gaya hota shua-e-mehr se ye shahr bhi

KHairiyat guzri ki KHwabon ka nagar pani mein hai

is bulandi se lagaun kis taraf ab main chhalang

ek dar hai dasht mein to ek dar pani mein hai

ho chuke hain kab ke chakna-chur aaine sabhi

ye to 'mohsin' apna hi aks-e-nazar pani mein hai