is tarah aankhon ko nam dil par asar karte hue

is tarah āñkhoñ ko nam dil par asar karte hue

jā rahā hai kaun nezoñ par safar karte hue

zindagī fāqoñ ke saa.e meñ basar karte hue

jī rahā huuñ ḳhūn-e-dil ḳhūn-e-jigar karte hue

likh rahā huuñ naam bachchoñ ke ġhamoñ kī jā.idād

un kī sub.h-e-zindagī ko dopahar karte hue

itne vahshat-nāk manzar putliyoñ meñ bas ga.e

ḳhvāb bhī Darne lage āñkhoñ meñ ghar karte hue

sīna-e-mauj-e-ravāñ ko ābloñ se bhar diyā

pyaas kī shiddat ne paanī par asar karte hue

vaqt kī raftār se bhī tez chalnā hai mujhe

jā rahā huuñ ab havā ko ham-safar karte hue

jaane kitnī Thokareñ khā.īñ haiñ maiñ ne ai 'razā'

e'tidāl-e-zindagī ko tez-tar karte hue

is tarah aankhon ko nam dil par asar karte hue

ja raha hai kaun nezon par safar karte hue

zindagi faqon ke sae mein basar karte hue

ji raha hun KHun-e-dil KHun-e-jigar karte hue

likh raha hun nam bachchon ke ghamon ki jaidad

un ki subh-e-zindagi ko dopahar karte hue

itne wahshat-nak manzar putliyon mein bas gae

KHwab bhi Darne lage aankhon mein ghar karte hue

sina-e-mauj-e-rawan ko aablon se bhar diya

pyas ki shiddat ne pani par asar karte hue

waqt ki raftar se bhi tez chalna hai mujhe

ja raha hun ab hawa ko ham-safar karte hue

jaane kitni Thokaren khain hain main ne ai 'raza'

e'tidal-e-zindagi ko tez-tar karte hue