is tarah dekhta hun udhar wo jidhar na ho

is tarah dekhtā huuñ udhar vo jidhar na ho

jaise dikhā.ī de koī sūrat magar na ho

ye shahr-e-nā-shanās hai kyā is kā e'tibār

achchhā rahegā vo jo yahāñ mo'atabar na ho

is tarah chal rahā hai ra.ūnat ke saath vo

jaise ḳhirām-e-nāz se aage safar na ho

maiñ aaj huuñ so mujh ko samā.at bhī chāhiye

mumkin hai ye suḳhan kabhī bār-e-digar na ho

hone do aaj shāḳh-e-tamannā ko bārvar

mumkin hai kal nafas kā yahāñ se guzar na ho

maiñ bhī dikhā.ūñ shauq kī jaulāniyāñ tujhe

ye musht-e-ḳhāk raah meñ haa.il agar na ho

nām-o-numūd se mujhe aise gurez hai

jaise ye kār-e-ḳhair ho kār-e-hunar na ho

apnā pata bhī DhūñDne jaanā hai ek din

filhāl chāhtā huuñ ki tū dar-ba-dar na ho

ik ye fareb dekhnā baaqī hai vaqt kā

dil Duub jaa.e aur dobāra sahar na ho

ye kyā ki ham-rikāb rahe ḳhāk-e-rahguzar

kis kaam kā junūñ jo qadam dasht-bhar na ho

is tarah dekhta hun udhar wo jidhar na ho

jaise dikhai de koi surat magar na ho

ye shahr-e-na-shanas hai kya is ka e'tibar

achchha rahega wo jo yahan mo'atabar na ho

is tarah chal raha hai raunat ke sath wo

jaise KHiram-e-naz se aage safar na ho

main aaj hun so mujh ko samaat bhi chahiye

mumkin hai ye suKHan kabhi bar-e-digar na ho

hone do aaj shaKH-e-tamanna ko barwar

mumkin hai kal nafas ka yahan se guzar na ho

main bhi dikhaun shauq ki jaulaniyan tujhe

ye musht-e-KHak rah mein hail agar na ho

nam-o-numud se mujhe aise gurez hai

jaise ye kar-e-KHair ho kar-e-hunar na ho

apna pata bhi DhunDne jaana hai ek din

filhaal chahta hun ki tu dar-ba-dar na ho

ek ye fareb dekhna baqi hai waqt ka

dil Dub jae aur dobara sahar na ho

ye kya ki ham-rikab rahe KHak-e-rahguzar

kis kaam ka junun jo qadam dasht-bhar na ho