is tarah duniya mein dil ko mahram-e-gham kijiye

is tarah duniyā meñ dil ko mahram-e-ġham kījiye

jab ḳhushī koī mayassar ho to mātam kījiye

ishq se phir silsila jumbānī-e-ġham kījiye

zindagī par maut ko pahle muqaddam kījiye

husn kī jānib nigāh-e-shauq yā kam kījiye

yā nigāh-e-shauq ko ik ahd-e-mohkam kījiye

maut kā kyā maut kā to sau tarah ġham kījiye

zindagī nāshād kā kis tarah mātam kījiye

dekh kar ahl-e-tarab kā sāz-o-sāmān-e-tarab

bad-nasīboñ kā zarā andāza-e-ġham kījiye

jaane kis aalam kī hasrat meñ haiñ nazreñ muztarib

varna kyā nazzāra-e-husn-e-do-ālam kījiye

ab junūñ kī sarhadoñ se aa milā hai josh-e-ishq

kuchh samajh kar ab nigāh-e-husn barham kījiye

ahl-e-ishrat apnī bazm-e-aish-o-ishrat ke qarīb

ehtiyātan mun.aqid ik bazm-e-mātam kījiye

āñsuoñ kā poñchhne vaalā hī jab koī na ho

aah kis ummīd par āñkhoñ ko pur-nam kījiye

ġham ko hone dījiye ho jis qadar mānūs dil

dil ko jitnā ho sake begāna-e-ġham kījiye

phir qafas se lauT kar aa.e chaman meñ phir vahī

āshiyāñ ke vāste tinke farāham kījiye

haiñ nigāhoñ kī hadoñ se duur abhī bebākiyāñ

shoḳh chitvan se ġhurūr-e-husn ko kam kījiye

tā-kujā āvāra-e-nazzāra chashm-e-husn-e-dost

jam.a ik markaz pe kyuuñ kar husn-e-ālam kījiye

har ḳhushī ne is natīje par hameñ pahuñchā diyā

jab ḳhushī koī mayassar ho to mātam kījiye

aarzū se baḌh ke dushman koī insāñ kā nahīñ

jis qadar mumkin ho 'bismil' aarzū kam kījiye

is tarah duniya mein dil ko mahram-e-gham kijiye

jab KHushi koi mayassar ho to matam kijiye

ishq se phir silsila jumbani-e-gham kijiye

zindagi par maut ko pahle muqaddam kijiye

husn ki jaanib nigah-e-shauq ya kam kijiye

ya nigah-e-shauq ko ek ahd-e-mohkam kijiye

maut ka kya maut ka to sau tarah gham kijiye

zindagi nashad ka kis tarah matam kijiye

dekh kar ahl-e-tarab ka saz-o-saman-e-tarab

bad-nasibon ka zara andaza-e-gham kijiye

jaane kis aalam ki hasrat mein hain nazren muztarib

warna kya nazzara-e-husn-e-do-alam kijiye

ab junun ki sarhadon se aa mila hai josh-e-ishq

kuchh samajh kar ab nigah-e-husn barham kijiye

ahl-e-ishrat apni bazm-e-aish-o-ishrat ke qarib

ehtiyatan munaqid ek bazm-e-matam kijiye

aansuon ka ponchhne wala hi jab koi na ho

aah kis ummid par aankhon ko pur-nam kijiye

gham ko hone dijiye ho jis qadar manus dil

dil ko jitna ho sake begana-e-gham kijiye

phir qafas se lauT kar aae chaman mein phir wahi

aashiyan ke waste tinke faraham kijiye

hain nigahon ki hadon se dur abhi bebakiyan

shoKH chitwan se ghurur-e-husn ko kam kijiye

ta-kuja aawara-e-nazzara chashm-e-husn-e-dost

jama ek markaz pe kyun kar husn-e-alam kijiye

har KHushi ne is natije par hamein pahuncha diya

jab KHushi koi mayassar ho to matam kijiye

aarzu se baDh ke dushman koi insan ka nahin

jis qadar mumkin ho 'bismil' aarzu kam kijiye