is tarah gesu-e-shab-gun hain ruKH-e-jaanan ke pas

is tarah gesū-e-shab-gūñ haiñ ruḳh-e-jānāñ ke paas

jaise chhā.ī ho ghaTā kaalī mah-e-tābāñ ke paas

is tarah hai aañkh kī gardish tire mizhgāñ ke paas

phirte haiñ jis tarah aahū tiir ke paikāñ ke paas

raat din rahtī haiñ zulfeñ is tarah ruḳh ke qarīb

jis tarah rahte haiñ kāfir sāhab-e-īmāñ ke paas

aa gayā hai kyā abhī se mausam-e-fasl-e-bahār

kis liye jaane lagā dast-e-junūñ dāmāñ ke paas

paas āñkhoñ ke tire ruḳhsār kab haiñ gul-badan

haiñ gul-e-lāla shagufta nargis-e-hairāñ ke paas

rashk-e-yūsuf ḳhat hai yuuñ tere zanaḳhdāñ ke qarīñ

kārvāñ jis tarah utrā ho chah-e-kan.āñ ke paas

kyoñ adū ke paas le jaate ho mujh ko dosto

kaam kyā insāñ kā batlāo to hai shaitāñ ke paas

ghar ko dushman ke lagānā aag kā ai sho.ala-rū

kuchh nahīñ mushkil hamāre sozish-e-pinhāñ ke paas

kis liye 'ḳhanjar' ko paas aane se tum karte ho man.a

āḳhir insāñ hī to aatā jaatā hai insāñ ke paas

is tarah gesu-e-shab-gun hain ruKH-e-jaanan ke pas

jaise chhai ho ghaTa kali mah-e-taban ke pas

is tarah hai aankh ki gardish tere mizhgan ke pas

phirte hain jis tarah aahu tir ke paikan ke pas

raat din rahti hain zulfen is tarah ruKH ke qarib

jis tarah rahte hain kafir sahab-e-iman ke pas

aa gaya hai kya abhi se mausam-e-fasl-e-bahaar

kis liye jaane laga dast-e-junun daman ke pas

pas aankhon ke tere ruKHsar kab hain gul-badan

hain gul-e-lala shagufta nargis-e-hairan ke pas

rashk-e-yusuf KHat hai yun tere zanaKHdan ke qarin

karwan jis tarah utra ho chah-e-kanan ke pas

kyon adu ke pas le jate ho mujh ko dosto

kaam kya insan ka batlao to hai shaitan ke pas

ghar ko dushman ke lagana aag ka ai shoala-ru

kuchh nahin mushkil hamare sozish-e-pinhan ke pas

kis liye 'KHanjar' ko pas aane se tum karte ho mana

aaKHir insan hi to aata jata hai insan ke pas