is tarah gum hun KHayalon mein kuchh ehsas nahin

is tarah gum huuñ ḳhayāloñ meñ kuchh ehsās nahīñ

kaun hai paas mire kaun mire paas nahīñ

dard jab had meñ rahe dard kā bhī lutf mile

ye bhī kyā ġham hai ki jis ġham kā kuchh ehsās nahīñ

is tarah shauq-e-mohabbat meñ na gum ho koī

mujh ko ulfat bhī kisī se hai ye ehsās nahīñ

ye haiñ ulfat ke karishme ki ilāhī tauba

yuuñ mire paas haiñ vo jaise mire paas nahīñ

kāñToñ ko rauñdtā maiñ baḌhtā chalā jaatā huuñ

shauq-e-dīdār meñ manzil kā bhī ehsās nahīñ

sub.h kā taarā bhī mādūm huā jaatā hai

'shauq' ab us ke karam kī hameñ kuchh aas nahīñ

is tarah gum hun KHayalon mein kuchh ehsas nahin

kaun hai pas mere kaun mere pas nahin

dard jab had mein rahe dard ka bhi lutf mile

ye bhi kya gham hai ki jis gham ka kuchh ehsas nahin

is tarah shauq-e-mohabbat mein na gum ho koi

mujh ko ulfat bhi kisi se hai ye ehsas nahin

ye hain ulfat ke karishme ki ilahi tauba

yun mere pas hain wo jaise mere pas nahin

kanTon ko raundta main baDhta chala jata hun

shauq-e-didar mein manzil ka bhi ehsas nahin

subh ka tara bhi madum hua jata hai

'shauq' ab us ke karam ki hamein kuchh aas nahin