is tarah ka KHwab maine aaj tak dekha na tha

is tarah kā ḳhvāb maiñ ne aaj tak dekhā na thā

apnī hī āvāz par ḳhud is qadar chauñkā na thā

sab ke sab tārīkiyoñ ke ġhaar meñ gum ho ga.e

maiñ ne jab palkeñ uThā.īñ ek hī chehra na thā

saḳht-tar dushvāriyāñ haa.il thiiñ merī raah meñ

duur tak sahrā hī sahrā thā kahīñ saaya na thā

fikr ke gahre khañDar meñ zehn merā Duub kar

is qadar ubhregā mujh ko is kā andāza na thā

ḳhāna-e-dil meñ ye ab kis kā baserā ho gayā

pahle is vīrān ghar meñ koī bhī rahtā na thā

vo miTānā chāhtā thā ḳhvāhishoñ kī pyaas jab

narm-o-nāzuk jism meñ tab josh kā dariyā na thā

ye mohabbat kī kahānī un dinoñ kī baat hai

yaar ke gesū meñ jab 'parvez' ḳham aayā na thā

is tarah ka KHwab main ne aaj tak dekha na tha

apni hi aawaz par KHud is qadar chaunka na tha

sab ke sab tarikiyon ke ghaar mein gum ho gae

main ne jab palken uThain ek hi chehra na tha

saKHt-tar dushwariyan hail thin meri rah mein

dur tak sahra hi sahra tha kahin saya na tha

fikr ke gahre khanDar mein zehn mera Dub kar

is qadar ubhrega mujh ko is ka andaza na tha

KHana-e-dil mein ye ab kis ka basera ho gaya

pahle is viran ghar mein koi bhi rahta na tha

wo miTana chahta tha KHwahishon ki pyas jab

narm-o-nazuk jism mein tab josh ka dariya na tha

ye mohabbat ki kahani un dinon ki baat hai

yar ke gesu mein jab 'parwez' KHam aaya na tha