is tarah karte hain kuchh log baDai uski

is tarah karte haiñ kuchh log baḌā.ī us kī

ḳhalq us kī hai ḳhudā us kā ḳhudā.ī us kī

kyā ḳhabar thī ki yahīñ vasl ke saa.e ke qarīb

dhuup ke beach paḌī hogī judā.ī us kī

le ga.e shauq se marhūm kī har shai ahbāb

chhoḌ dī taaq ke uupar hī achchhā.ī us kī

kī hai iflās meñ doshīza-e-ummīd javāñ

ab to bas baiTh ke khānī hai kamā.ī us kī

zindagī kaTtī hai donoñ kī musalsal zid meñ

qaid hai merī vahī jo hai rihā.ī us kī

mo'atabar naam thā vo phir bhī havāla na diyā

jaañ bachāne ko qasam jhūTī na khaa.ī us kī

zindagī saarī gañvā duuñ ye zarūrī to nahīñ

ye bahut hai ki koī baat nibhā.ī us kī

ye mohabbat nahīñ kuchh aur hai sūrat 'shāhīñ'

tum maza le ke jo sunte ho burā.ī us kī

is tarah karte hain kuchh log baDai us ki

KHalq us ki hai KHuda us ka KHudai us ki

kya KHabar thi ki yahin wasl ke sae ke qarib

dhup ke beach paDi hogi judai us ki

le gae shauq se marhum ki har shai ahbab

chhoD di taq ke upar hi achchhai us ki

ki hai iflas mein doshiza-e-ummid jawan

ab to bas baiTh ke khani hai kamai us ki

zindagi kaTti hai donon ki musalsal zid mein

qaid hai meri wahi jo hai rihai us ki

mo'atabar nam tha wo phir bhi hawala na diya

jaan bachane ko qasam jhuTi na khai us ki

zindagi sari ganwa dun ye zaruri to nahin

ye bahut hai ki koi baat nibhai us ki

ye mohabbat nahin kuchh aur hai surat 'shahin'

tum maza le ke jo sunte ho burai us ki