is tarah lagta hai wo aks-e-badan pani mein

is tarah lagtā hai vo aks-e-badan paanī meñ

jaise hañste hoñ gulāboñ ke chaman paanī meñ

chāñd ne chhoḌ diyā jhiil kā āñgan jab se

ab parinde kā nahīñ lagtā hai man paanī meñ

phir huā yuuñ ki libās apnā kināre rakh ke

kar ga.ī jast hasīñ shauq kiran paanī meñ

vo tapish hai ki piyeñ kuchh bhī to pyaas aur baḌhe

aag aisī hai ki jalte haiñ dahan paanī meñ

zindagī tū mujhe kal shaam bahut yaad aa.ī

dekh kar Dūbte sūraj kī thakan paanī meñ

zehn-e-shā’ir meñ machalte hue afkār-o-ḳhayāl

sat.h-e-dariyā pe paḌe jaise shikan paanī meñ

dekhiye jā ke kahāñ Thahre ye sail-e-ranjish

Duub jaa.e na kahīñ saarā vatan paanī meñ

mujh se dekhā nahīñ jaatā kabhī dekhūñ jo 'bashīr'

aatī jaatī huī lahroñ kā milan paanī meñ

is tarah lagta hai wo aks-e-badan pani mein

jaise hanste hon gulabon ke chaman pani mein

chand ne chhoD diya jhil ka aangan jab se

ab parinde ka nahin lagta hai man pani mein

phir hua yun ki libas apna kinare rakh ke

kar gai jast hasin shauq kiran pani mein

wo tapish hai ki piyen kuchh bhi to pyas aur baDhe

aag aisi hai ki jalte hain dahan pani mein

zindagi tu mujhe kal sham bahut yaad aai

dekh kar Dubte suraj ki thakan pani mein

zehn-e-sha’ir mein machalte hue afkar-o-KHayal

sath-e-dariya pe paDe jaise shikan pani mein

dekhiye ja ke kahan Thahre ye sail-e-ranjish

Dub jae na kahin sara watan pani mein

mujh se dekha nahin jata kabhi dekhun jo 'bashir'

aati jati hui lahron ka milan pani mein