is tarah mat apni tanhai ko zae kijiye

is tarah mat apnī tanhā.ī ko zaa.e' kījiye

apne 'āshiq ko zarā ghar par bulāyā kījiye

chhū ke kar diije hameñ ġhā.eb jahān-e-ḳhāk se

jo haqīqat hai use ik din kināya kījiye

qatl kiije shauq se ham ko sar-e-bāzār aap

aur hamārī nā'sh galiyoñ meñ phirāyā kījiye

aap kī dahlīz par baiThā huā raahī huuñ maiñ

ik zarā ghar se nikaliye aur saayā kījiye

lafz aur iz.hār ke saare vasā.il aap ke

ab hamāre paas jo kuchh hai parāyā kījiye

aap ke aane se ham aate haiñ apne aap meñ

ik karam kiije hamāre paas aayā kījiye

dhuup kī shiddat meñ saarā husn kumhlā jā.egā

kholiye zulfoñ ko aur chehre pe saayā kījiye

is tarah mat apni tanhai ko zae' kijiye

apne 'ashiq ko zara ghar par bulaya kijiye

chhu ke kar dije hamein ghaeb jahan-e-KHak se

jo haqiqat hai use ek din kinaya kijiye

qatl kije shauq se hum ko sar-e-bazar aap

aur hamari na'sh galiyon mein phiraya kijiye

aap ki dahliz par baiTha hua rahi hun main

ek zara ghar se nikaliye aur saya kijiye

lafz aur izhaar ke sare wasail aap ke

ab hamare pas jo kuchh hai paraya kijiye

aap ke aane se hum aate hain apne aap mein

ek karam kije hamare pas aaya kijiye

dhup ki shiddat mein sara husn kumhla jaega

kholiye zulfon ko aur chehre pe saya kijiye