is tarah meri wafaon ka sila de mujhko

is tarah merī vafāoñ kā sila de mujh ko

har tamanna kī jagah zaḳhm nayā de mujh ko

mujh ko jo baat bhī kahnī thī sar-e-ām kahī

marzī-e-vaqt hai jo chāhe sazā de mujh ko

maiñ ki har-chand koī gauhar-e-nāyāb nahīñ

itnā sastā bhī nahīñ huuñ ki luTā de mujh ko

husn-e-kirdār kā mere use iqrār to hai

ye alag baat vo nazroñ se girā de mujh ko

maiñ bahut duur bahut duur nikal aaya huuñ

mere maazī se na ai dost sadā de mujh ko

maiñ sar-e-rāh-e-vafā ek laraztā sā diyā

terī marzī hai jalā de ki bujhā de mujh ko

maiñ tire ahd kī āvāz huuñ pahchān bhī huuñ

qadr kar merī na is tarah gañvā de mujh ko

yā mujhe quvvat-e-tasḳhīr-e-do-ālam ho atā

varna māmūra-e-hastī se miTā de mujh ko

ḳhas-o-ḳhāshāk kī mānind paḌā rahne do

ḳhud bikhar jā.ūñgā tū yuuñ na uḌā de mujh ko

vaqt kā faisla ab tū bhī gavārā kar le

maiñ tujhe bhuul gayā tū bhī bhulā de mujh ko

aaj kis haal meñ yārān-e-vatan haiñ 'vāsil'

ai nasīm-e-saharī kuchh to batā de mujh ko

is tarah meri wafaon ka sila de mujh ko

har tamanna ki jagah zaKHm naya de mujh ko

mujh ko jo baat bhi kahni thi sar-e-am kahi

marzi-e-waqt hai jo chahe saza de mujh ko

main ki har-chand koi gauhar-e-nayab nahin

itna sasta bhi nahin hun ki luTa de mujh ko

husn-e-kirdar ka mere use iqrar to hai

ye alag baat wo nazron se gira de mujh ko

main bahut dur bahut dur nikal aaya hun

mere mazi se na ai dost sada de mujh ko

main sar-e-rah-e-wafa ek larazta sa diya

teri marzi hai jala de ki bujha de mujh ko

main tere ahd ki aawaz hun pahchan bhi hun

qadr kar meri na is tarah ganwa de mujh ko

ya mujhe quwwat-e-tasKHir-e-do-alam ho ata

warna mamura-e-hasti se miTa de mujh ko

KHas-o-KHashak ki manind paDa rahne do

KHud bikhar jaunga tu yun na uDa de mujh ko

waqt ka faisla ab tu bhi gawara kar le

main tujhe bhul gaya tu bhi bhula de mujh ko

aaj kis haal mein yaran-e-watan hain 'wasil'

ai nasim-e-sahari kuchh to bata de mujh ko