is tarah TuT ke rahon mein na bikhra hota

is tarah TuuT ke rāhoñ meñ na bikhrā hotā

maiñ ne is dil ko hifāzat se jo rakkhā hotā

Duub jaane meñ qabāhat to nahīñ thī lekin

koī dariyā to mirī soch se gahrā hotā

dasht meñ jaate hī tum lauT ke vāpas aa.e

kam se kam ḳhaak ko uḌte hue dekhā hotā

pā-ba-zanjīr kahāñ hotī shikasta-pā.ī

rāstoñ ne jo mirā saath nibhāyā hotā

jaane kyā soch ke chup huuñ maiñ vagarna zālim

dekhte sab sar-e-maqtal vo tamāsha hotā

gar javāñ rahtā mire azm kā sūraj 'resham'

merī rāhoñ meñ bhalā kyoñ ye añdherā hotā

is tarah TuT ke rahon mein na bikhra hota

main ne is dil ko hifazat se jo rakkha hota

Dub jaane mein qabahat to nahin thi lekin

koi dariya to meri soch se gahra hota

dasht mein jate hi tum lauT ke wapas aae

kam se kam KHak ko uDte hue dekha hota

pa-ba-zanjir kahan hoti shikasta-pai

raston ne jo mera sath nibhaya hota

jaane kya soch ke chup hun main wagarna zalim

dekhte sab sar-e-maqtal wo tamasha hota

gar jawan rahta mere azm ka suraj 'resham'

meri rahon mein bhala kyon ye andhera hota