is tark-e-talluq ka ajab mujh par asar tha

is tark-e-ta.alluq kā ajab mujh par asar thā

ḳhud hī vo jalā Daalā jo yādoñ kā shajar thā

sahrā meñ gulāboñ ko ugāne kī tamannā

ye ḳhvāb anokhā sā mire pesh-e-nazar thā

vo lauT ke ik din jo pashemāñ chalā aayā

mere hī vo jazboñ kī sadāqat kā sahar thā

vo merī durīdoñ meñ bhī maujūd rahā hai

maiñ kaise bhulā detī nahīñ us se mafar thā

baaqī rahā kāñToñ meñ lahū hone ke bā-vasf

ḳhuddārī kā ehsās mirā kaisā niDar thā

laa.eq hī na thā koī makīñ dil meñ jo rahtā

varna ye kushāda to bahut rahne ko ghar thā

jin kirchiyoñ se merā badan aaj lahū hai

vo TuuT ke bikhrā mirā hī shīsh-nagar thā

dil dhaḌkā qadam ThiThke palaT kar huā mālūm

jis ne ye sadā dī thī tirā rāhguzar thā

ik andhā irāda liye jaatā hai kisī samt

jab Thahre to dekhā na safar thā na hazar thā

is lazzat-e-taḳhlīq kī kāvish meñ phañsā jo

niklā na kabhī us se ye aisā hī bhañvar thā

manzil na thī koī na hī rasta nazar aatā

ye sab usī tafrīq-o-ta.assub kā samar thā

is tark-e-talluq ka ajab mujh par asar tha

KHud hi wo jala Dala jo yaadon ka shajar tha

sahra mein gulabon ko ugane ki tamanna

ye KHwab anokha sa mere pesh-e-nazar tha

wo lauT ke ek din jo pasheman chala aaya

mere hi wo jazbon ki sadaqat ka sahar tha

wo meri duridon mein bhi maujud raha hai

main kaise bhula deti nahin us se mafar tha

baqi raha kanTon mein lahu hone ke ba-wasf

KHuddari ka ehsas mera kaisa niDar tha

laeq hi na tha koi makin dil mein jo rahta

warna ye kushada to bahut rahne ko ghar tha

jin kirchiyon se mera badan aaj lahu hai

wo TuT ke bikhra mera hi shish-nagar tha

dil dhaDka qadam ThiThke palaT kar hua malum

jis ne ye sada di thi tera rahguzar tha

ek andha irada liye jata hai kisi samt

jab Thahre to dekha na safar tha na hazar tha

is lazzat-e-taKHliq ki kawish mein phansa jo

nikla na kabhi us se ye aisa hi bhanwar tha

manzil na thi koi na hi rasta nazar aata

ye sab usi tafriq-o-tassub ka samar tha