is uqda-e-la-harf ko hal kar liya jae

is 'uqda-e-lā-harf ko hal kar liyā jaa.e

ḳhāmoshī ko suljhā ke ġhazal kar liyā jaa.e

us yūsuf-e-daurāñ se qarābat na rakheñ ham

tajvīz-e-azīzāñ pe 'amal kar liyā jaa.e

aisī bhī mohabbat nahīñ us shaḳhs se ham ko

jis ke liye ā'sāb ko shal kar liyā jaa.e

mujh se tirī chūḌī kī khanak pūchh rahī hai

daryāft koī pyaar kā pal kar liyā jaa.e

is 'ahd-e-falākat meñ yahī baat bahut hai

tā'mīr koī ḳhvāb-mahal kar liyā jaa.e

vaise to mujhe shauq nahīñ kār-e-junūñ kā

tū pyaar se kahtī hai to chal kar liyā jaa.e

har mas.ale par baat hī karte na raheñ ham

behtar hai koī mas.ala hal kar liyā jaa.e

dil ko tirī duurī se 'ajab Thes lagī thī

badla tire hoñToñ ko kuchal kar liyā jaa.e

be-'ishq-e-butāñ 'umr guzārī nahīñ jaatī

achchhā hai ki paidā ye ḳhalal kar liyā jaa.e

is 'uqda-e-la-harf ko hal kar liya jae

KHamoshi ko suljha ke ghazal kar liya jae

us yusuf-e-dauran se qarabat na rakhen hum

tajwiz-e-azizan pe 'amal kar liya jae

aisi bhi mohabbat nahin us shaKHs se hum ko

jis ke liye aa'sab ko shal kar liya jae

mujh se teri chuDi ki khanak puchh rahi hai

daryaft koi pyar ka pal kar liya jae

is 'ahd-e-falakat mein yahi baat bahut hai

ta'mir koi KHwab-mahal kar liya jae

waise to mujhe shauq nahin kar-e-junun ka

tu pyar se kahti hai to chal kar liya jae

har masale par baat hi karte na rahen hum

behtar hai koi masala hal kar liya jae

dil ko teri duri se 'ajab Thes lagi thi

badla tere honTon ko kuchal kar liya jae

be-'ishq-e-butan 'umr guzari nahin jati

achchha hai ki paida ye KHalal kar liya jae