ishaaron se agar mujhko bula lete to achchha tha

ishāroñ se agar mujh ko bulā lete to achchhā thā

mujhe bhī hāl-e-dil apnā sunā lete to achchhā thā

mujhe hāsil ḳhushī hotī tumheñ dil kā sukūñ miltā

mire dil se tum apnā dil milā lete to achchhā thā

na hotā inkishāf apnī mohabbat kā zamāne meñ

ye aañsū apnī palkoñ meñ chhupā lete to achchhā thā

mirī betābī-e-dil ko to kam se kam qarār aatā

agar mujh se nazar apnī milā lete to achchhā thā

baġhair us ke ye jiinā ho gayā dushvār ab kitnā

vo rūThā thā hamī us ko manā lete to achchhā thā

gile shikve suno tum bhuul kar saare zamāne ke

hameñ phir se gale apne lagā lete to achchhā thā

ḳhushī se kaT hī jaatī chaar din kī zindagī apnī

magar dil meñ mire ġham ko basā lete to achchhā thā

bhaTakte yuuñ na phirte ham tirī galiyoñ meñ āvāra

buzurgoñ kī agar dil se duā lete to achchhā thā

kise ma.alūm thā 'rāmish' gireñgī bijliyāñ ik din

nasheman ḳhud hī hāthoñ se jalā lete to achchhā thā

ishaaron se agar mujh ko bula lete to achchha tha

mujhe bhi haal-e-dil apna suna lete to achchha tha

mujhe hasil KHushi hoti tumhein dil ka sukun milta

mere dil se tum apna dil mila lete to achchha tha

na hota inkishaf apni mohabbat ka zamane mein

ye aansu apni palkon mein chhupa lete to achchha tha

meri betabi-e-dil ko to kam se kam qarar aata

agar mujh se nazar apni mila lete to achchha tha

baghair us ke ye jina ho gaya dushwar ab kitna

wo ruTha tha hami us ko mana lete to achchha tha

gile shikwe suno tum bhul kar sare zamane ke

hamein phir se gale apne laga lete to achchha tha

KHushi se kaT hi jati chaar din ki zindagi apni

magar dil mein mere gham ko basa lete to achchha tha

bhaTakte yun na phirte hum teri galiyon mein aawara

buzurgon ki agar dil se dua lete to achchha tha

kise malum tha 'ramish' girengi bijliyan ek din

nasheman KHud hi hathon se jala lete to achchha tha