ishq ab meri jaan hai goya

'ishq ab merī jaan hai goyā

jaan ab mehmān hai goyā

jis ko dekho vahī hai garm-e-talāsh

kahīñ us kā nishān hai goyā

hai qayāmat uThān zālim kī

vo abhī se javān hai goyā

māñge jā.eñge tujh ko ham tujh se

muñh meñ jab tak zabān hai goyā

jī bahalne ko log sunte haiñ

dard-e-dil dāstān hai goyā

dil meñ kaise vo be-takalluf haiñ

un kā apnā makān hai goyā

haa.e us ālam-āshnā kī nazar

har nazar meñ jahān hai goyā

achchhe-achchhoñ ko phāñs rakkhā hai

zāl-e-duniyā javān hai goyā

is suḳhan kā 'jalīl' kyā kahnā

'mus.hafī' kī zabān hai goyā

'ishq ab meri jaan hai goya

jaan ab mehman hai goya

jis ko dekho wahi hai garm-e-talash

kahin us ka nishan hai goya

hai qayamat uThan zalim ki

wo abhi se jawan hai goya

mange jaenge tujh ko hum tujh se

munh mein jab tak zaban hai goya

ji bahalne ko log sunte hain

dard-e-dil dastan hai goya

dil mein kaise wo be-takalluf hain

un ka apna makan hai goya

hae us aalam-ashna ki nazar

har nazar mein jahan hai goya

achchhe-achchhon ko phans rakkha hai

zal-e-duniya jawan hai goya

is suKHan ka 'jalil' kya kahna

'mushafi' ki zaban hai goya