ishq bahut KHamosh hai ahmar bare kuchh hushiyar karen

ishq bahut ḳhāmosh hai 'ahmar' baare kuchh hushiyār kareñ

ḳhūn-e-jigar ke chhīñTe de kar jashn-e-gul-o-gulzār kareñ

us kā shikva us ke hī aage kaise ham nā-chār kareñ

sūrat jis kī dekhte hī bas jī ye chāhe pyaar kareñ

razm-gah-e-ushshāq hai ye sarkār yahāñ kuchh kaar kareñ

surme kā dumbāla de kar nainoñ ko talvār kareñ

aise zulm-shiāroñ se ham kyūñkar rah hamvār kareñ

dil kī jo pūchheñ baat na ik din dil par sau sau vaar kareñ

muddat se ik aas lagī hai ham bhī kabhī dīdār kareñ

ek jhalak kī baat hī kyā hai aap agar upkār kareñ

dil ko yahī ik dhun hai lagī har sub.h-o-masā har aaTh pahar

naam japeñ har lahza un kā zikr kareñ azkār kareñ

sheva arz-guzārī kā to ishq meñ lāzim Thahrā hai

aise par nādān nahīñ ham un se aur takrār kareñ

dil par jo kuchh biit rahī hai ḳhair yahī hai dil meñ rahe

'ahmar' ye vo raaz nahīñ ki mahfil meñ bistār kareñ

ishq bahut KHamosh hai 'ahmar' bare kuchh hushiyar karen

KHun-e-jigar ke chhinTe de kar jashn-e-gul-o-gulzar karen

us ka shikwa us ke hi aage kaise hum na-chaar karen

surat jis ki dekhte hi bas ji ye chahe pyar karen

razm-gah-e-ushshaq hai ye sarkar yahan kuchh kar karen

surme ka dumbaala de kar nainon ko talwar karen

aise zulm-shiaron se hum kyunkar rah hamwar karen

dil ki jo puchhen baat na ek din dil par sau sau war karen

muddat se ek aas lagi hai hum bhi kabhi didar karen

ek jhalak ki baat hi kya hai aap agar upkar karen

dil ko yahi ek dhun hai lagi har subh-o-masa har aaTh pahar

nam japen har lahza un ka zikr karen azkar karen

shewa arz-guzari ka to ishq mein lazim Thahra hai

aise par nadan nahin hum un se aur takrar karen

dil par jo kuchh bit rahi hai KHair yahi hai dil mein rahe

'ahmar' ye wo raaz nahin ki mahfil mein bistar karen